in , ,

ليه الثقافة الجنسية مهمة لأولادنا ؟

زمان و لأجيال كتير كان الكلام في الثقافة الجنسية عيب، و اللي بتسال او بتتكلم فيه  بيبقي عيارها فلت ، و كل الحاجات تقريبا كان متقفل عليها ، و محدش بياخد معلومة غير بعد الجواز، و حتي بعد الجواز في ستات كتير فضلت جاهلة جنسيا !

لكن دلوقتي و مع الانفتاح الرهيب اللي حاصل مابقاش ممكن نتعامل بنفس الطريقة في التقفيل او التضليل اللي أهالي كتير مننا عيشوهم فيها مع أولادنا ، 

بالإضافة انه مهم جدا و صحي جدا ان بناتنا و أولادنا يبقي عندهم ثقافة جنسية سوية لكذا سبب:

-اول حاجة انهم يفهموا جسمهم و طبيعته و احتياجاته

-تاني حاجة يفهموا العلاقات بشكل سوي و صحي و علمي 

-تالت حاجة يعرفوا يحافظوا علي نفسهم من أي استغلال جنسي 

-يعرفوا حدودهم و  حقوقهم و اللي ليهم و اللي عليهم

-يفهموا ان العلاقة الجنسية مش مجرد احتياج لازم يتقضي و خلاص ، و ان العلاقة الجنسية ليها اطار ربنا حطه و كرّمه و انها من اسمي العلاقات في اطارها المظبوط

-يفهموا ليه تعدد العلاقات الجنسية غلط و خطر 

– يعرفوا ان العلاقة الجنسية بتتمارس باشكال معينة في اطار معروف و بداية من سن معين 

-يفهموا امتي يقولوا لأ، و امتي يستمتعوا بنعمة ربنا وهبهالنا 

-يعرفوا ان العلاقة الجنسية مش قلة آدب، و لكن هي هي علاقة حميمة ربنا كرمها في اطارها السليم

الجيل اللي طالع من بناتنا و أولادنا العالم كله مفتوح قدامهم، و مهما كنتي مقفلة عليهم و بتفلتري اللي بيشوفوه، عمرك ما هتقدري تبقي مسيطرة بشكل كامل علي اللي بيعرفوه من اصحابهم سواء في مدرسة او تمارين و غيره،

ولان مش كل الأمهات عندها نفس الوعي، فهتلاقي من زمايل او أصحاب بنتك او ابنك بيتفرجوا علي كل حاجة ، يعني نتفلكس مفتوحة قدامهم ،و غيرها كتير من المنصات اللي بقت مليانة أفكار و ثقافات جنسية مش بس مفتوحة، لا و كمان ممكن تبقي بتصدر أفكار و آراء متطرفة جنسيا و بتصدّرها علي انها حاجة طبيعية أو حاجة مرتبطة بالتمدن و الثقافة و الحضارة!

ومش بس المنصات لا كمان السوشيال ميديا بالترندات المختلفة و البلوجرز اللي بيحطوا السم في العسل ، يعني تلاقي بلوجر اجنبية في العادي المحتوي بتاعها tips & tricks  و هوب في النص تلاقيها بتتكلم عن صاحبها مثلا و انهم عايشين مع بعض و لا مخلفين، فحتيلو انتي متابعة المحتوي هتلاقي حاجات بتتزق في النص !

طب لو قافلة السوشيال ميديا ، هتلاقي الموضوع جاي من اتجاه آخر الا و هو الواتس اب ستوريز ، الواتس اب معظم الولاد بيستخدموه عشان جروب المدرسة او التمرين ، هوب تلاقي اصحابهم اللي بيتفرجوا علي كل حاجة بيشيروا ترندات علي الواتس اب ستوري ، فمتبقيش عارفة تلاقيها منين و لا منين !

طب الحل ؟

الحل الأول و الأخير هو الحوار ، و مع الحوار الدايم المفتوح المليان ثقة بينك و بين ولادك كام حاجة كمان مهمين :

-لازم انتي نفسك تثقفي نفسك جنسيا عشان يبقي عندك معلومات تعرفي توصليها صح

-افتحي ديما باب للمناقشة معاهم ، مش مجرد ما تسمعي حاجة عن الحياة الجنسية تخافي و تتخضي و بالتالي هتردي ردود عنيفة زي ايه قلة الادب دي ، لان دة هيخوفهم منك و هيفقدهم الثقة انهم يعبروا قدامك او يسالوا عن حاجة مش فاهمينها، فالافضل ديما انك تهدي و تقلبي الموضوع لحوار ، زي انتي عرفتي منين  ؟طب قولي لي انتي تعرفي ايه و انا اقولك انا اعرف ايه ، و تبداي تصححي المفاهيم الغلط او تشرحي الموضوع ببساطة و تفهميهم انه لازم لما يسمعوا او يشوفوا حاجة يسالوكي انتي و يبقوا متاكدين انك هتردي بصراحة و هتعرفيهم الصح من اللي ممكن يتنقل لهم غلط ، لازم يعرفوا انك المرجع بتاعهم في أي حاجة عايزين يسالوا فيها .

-لو مش عارفة الإجابة عن حاجة لازم تقولي دة بشكل واضح، يعني بدل ما الموضوع يقلب خناقة بينكم و عرفتي منين و ازاي و تصرخي فيهم و خلاص لان معندكيش رد، الاحسن انك تقولي لهم انا هتاكد من كام حاجة و هرجع لكم نتكلم في الموضوع دة عشان اشرح لكم هو اصله ايه ، وماتنسيش و لا تهربي ، لازم بعد ما تتاكدي من المعلومة ترجعي تفتحي الحوار و تفهميهم انك مهتمة انك تردي و تشرحي اللي سالوا عليه.

ولادنا اذكياء جدا و مصادر معلوماتهم بقي لا حصر لها ، و صعب تتاكدي ان المعلومات دي سليمة او صح خصوصا لما الموضوع يبقي عن ثقافتهم الجنسية ؛

 عشان كدة مهم جدا نتكلم مع أولادنا و احنا اللي نشرح لهم و نفهمهم و نبقي مصدرهم الآمن الرئيسي، و مانعملش زي النعامة وهي دافنة وشها في الأرض ، الثقافة الجنسية شيء صحي لينا و لأولادنا ، ماتتكسفيش تعرفي و تفهمي عشانك و  عشان تعرفي تفهمي ولادك الصح من الغلط و تحافظي عليهم و علي صحتهم و ثقافتهم الجنسية!

بقلم نسمة مدحت

Nesma Medhat ُEntaleqi Chief Editor/Writer/Marketer/ Vlogger /Storyteller and Author for published books “إاللي إسمه إيه”& “أصل المثل

What do you think?

Written by Editor

Comments

Leave a Reply

Your email address will not be published. Required fields are marked *

Loading…

0

Comments

0 comments

أماكن تشتري منها منتجات مصرية يدوية قيمة

أغاني بيفكرونا بشتا التسعينات