الحقي خلفي….جملة ملهاش معنى مع تجميد البويضات

كتير أوي بنسمع عن جوازات، أوعن بنات بيوافقوا بجوازات هما مش مقتنعين بيها ، لمجرد إنها خايفة تكبر و ماتلحقش تخلف ، و في كتير بيتجوزوا كبار و بيبقوا لسه عايزين يستمتعوا بحياتهم مع شريك حياتهم ، بس مع الضغط من الأهالي و من الخوف إنها لو أجلت ماتعرفش تجيب أطفال بعد كدة، بتاخد قرار الخلفة و هي لسه مش مستعدة ، ولأن الخلفة و الأولاد نعمة كبيرة و مسئولية أكبر ، فلازم عشان تاخدي القرار دة أو الخطوة دي تبقي فعلا مستعدة .

العلم و التطور ماسابوش حاجة ماسهلوهاش علينا ، مؤخرا بقينا نسمع عن فكرة تجميد البويضات ، و اللي بالنسبة لي أنا شخصيا سمعت عنها بشكل اوضح سيكة في مسلسل ” سابع جار ” ، و لما تعمقت شوية في الموضوع و سألت دكاترة متخصصين فهمت أكتر وأكتر ، الموضوع ببساطة إن العلم وفرلنا دلوقتي اوبشن إننا مانستعجلش جوازة و خلاص عشان بحب الأطفال و نفسي يبقي عندي ولاد، و لا إني استعجل أول ما أتجوز إنه لازم الحق أخلف عشان أنا كبرت ، و لا لو أنا منفصلة و لسه مالاقتش حد تاني مناسب إني خلاص كدة هكبر و مش هعرف أخلف .

الموضوع أتغير…. 

إللي بيحصل بالظبط هو إن أي بنت أو ست تقدر دلوقتي تحتفظ ببيوضاتها لحد ما تقرر إنها تتجوز و تخلف ووقتها تقدر فعلا تعمل كدة، بغض النظر عن السن .

الموضوع بيمشي إزاي ؟ 

ببساطة الموضوع شبه فكرة الحقن المجهري أو أطفال الأنابيب و اللي بقي منتشر جدا ، بس هنا بنسبق خطوة و بنجمد البويضات اللي بعد كدة هنستخدمها في الحقن المجهري،  عشان البنت أو الست تبدأ تجمد بويضاتها ، أول حاجة الدكتور بياخد التاريخ العائلي الطبي ليها ، و بيتعملها مجموعة فحوصات، وبيطمنوا علي مخزون  البويضات بتاعتها بتحاليل دم و بيشوفوا بالموجات الصوتية حجم الرحم و المبيض ، و منها بيطمنوا تقريبا ممكن تطلع كام بويضة و بيبدأوا الخطوات. 

اللي بيحصل إنهم بيبدأوا مع بداية الدورة الشهرية و بتاخد حقن هرمونات منشطة عشان تنشط عمل المبايض و دي حاجة مش مقلقة خالص ، لإن الهرمونات دي هتتاخد لمدة 10-14 يوم تقريبا ، و بالتالي مافيش ضرر لإن تنشيط الهرمونات بيبقي لوقت محدود، الحقن بتتاخد من تاني يوم تقريبا للدورة و لمدة أسبوع بشكل مبدئي ، و بعدها الدكاترة بيتابعوا التبويض عن طريق الموجات الصوتية ، بيبدوا يقيسوا حجم البويضة أو الحويصلة اللي فيها البويضة كل يومين تقريبا، مع بعض تحاليل الدم لحد ما يتاكد الدكتور إن البويضة وصلت للحجم اللي لو اتسحبت دلوقتي هتبقي ناضجة، و بعدها بيتم عملية سحب البويضات وتجميد البويضات الناضجة بتكنيك معين في المعمل ، وهو نفس التكنيك المستخدم لتجميد الأجنة في الحقن المجهري.

البويضات بعدها بتتحفظ في المركز، يعني مافيش استعجال في جواز أو في خلفة ، ولو لاقدر الله داخلة رحلة علاج ممكن تأثر علي أحتمالية الحمل زي العلاج الكيماوي بتقدري تجمدي قدر من البويضات الصالحة قبل العلاج، و ممكن تستخدميها بعدها.

 و أحلي حاجة إنك لما بتاخدي البويضات دي في سن مناسب ، حتي لو حملتي فيهم متاخر، بتبقي كفاءة البويضات كأنك حملتي في الوقت دة ، يعني جمدتي بويضاتك في العشرين و استخدمتيهم في الأربعين هيبقي كأنك حملتي في العشرين .

أول ما بتقرري تحملي بعد ما جمدتي البويضات، إيه إللي بيحصل؟

بنبدأ خطوات الحقن المجهري العادية جدا ، بس طبعا عشان نفك البويضات و ندخل حمل لازم عقد جواز ساري ووجود الزوج و بتبدأي علطول رحلة الحمل .

مين أكتر حد يبقي مناسب  إنه يجمد بويضاته؟

-أي بنت أو ست هتتعرض لعلاج  هيأثر علي مخزون المبيض زي العلاج الكيماوي أو الأشعاعي

-لو البنت أو الست أتعرضت لمرض في المبيض خلاها تشيل واحد و التاني قلقانين عليه من نفس المرض

-التاريخ الأسري لو في أفراد من العيلة الدورة بتقطع عندهم بدري ، بنتطمن علي البنت اللي عندها التاريخ العائلي و ممكن تجمد البويضات تحسبا إن الدورة تتقطع عندها بدري زي باقي العيلة

-الأسباب الأجتماعية زي البنات إللي لسه ماقابلوش شريك الحياة المناسب، أو المتجوزين بس مش جاهزين حاليا للخلفة وخايفين علي الخصوبة بتاعتهم لأنها مرتبطة بالسن 

غير تجميد البويضات في كمان تجميد السائل المنوي للرجالة و اللي ممكن يبقوا بيقابلوا نفس مشكلة العلاج بالكيماوي أو الأشعاعي او عارفين ان تحليل السائل المنوي فيه مشكلة ولسه ماتجوزوش 

إيه أكتر مخاوف ممكن تفكري فيها و أنتي بتاخدي القرار؟

-لو بنت، العملية دي بتتعمل إزاي ؟ يعني ممكن تأثر علي غشاء البكارة ؟

الأجابة لأ، كل الأجراءات بتتعمل بعيدة جدا و مالهاش علاقة بغشاء البكارة لو بنت ، حتي السحب بيبقي عن طريق إبرة في البطن، و بتخرج بعد العملية و لا في جرح و لا غرز و لا أي أثر علي بطنها.

-جرعات الهرمونات اللي هتحقن بيها هتأثر عليا ؟

لأ ، لأن جرعات الهرمونات بتتاخد لمدة عشر أيام بس ، بالكتير 14 يوم، و دة مش هيأثر و مفعوله بينتهي مع نزول تاني دورة ،والجرعات بتتحدد علي حسب حالتك و علي حسب السن و المخزون ، لو طلعتي عدد كافي من البويضات يبقي هايل عشان أحتماليات النجاح في الحقن المجهري بعد كدة، وحتى لو العدد مش كافي ممكن تكرري الأجراء كله، وافضل عدد لبويضات قد تؤدى لحمل 15-20 بويضة، غير كدة مافيش  خوف من إنك تاخدي الهرمونات دي بناء علي تحديد الدكتور المعالج للكمية و لحالتك ، و مافيش أي أثبات  في العالم كله حتي الأن إن الهرمونات اللي بتتاخد دي سبب في أي نوع من أنواع السرطانات 

-هل دي حاجة مضمونة ؟

الخبرة بتقول إن في نسبة من البويضات دي ممكن تتحلل فكل ما كان عدد البويضات المجمدة أكتر كانت فرصة النجاح أكبر…وفي الآخر بتكون نفس نسب نجاح أي عملية حقن مجهري. 

-هل لو في تاريخ عائلي عندي لسرطان الثدي دة ممكن يخليني ماعرفش أجمد البويضات ؟

طبعا لازم يتعمل فحوصات الأول و بنقيم الحالة إن معندهاش مشكلة صحيا هي شخصيا و بيتحدد كمية الهرمونات اللي هتاخدها بناءا علي ذلك و بعدها تقدر تجمد بويضاتها عادي

-هل ممكن بويضاتي تتلخبط و أحمل في طفل حد تاني ؟  

هنا بقي أهم حاجة إنك تبقي بتتعاملي مع مكان كبير و سمعته كويسة جدا و عنده خبرة في موضوع التجميد ، دة غير إنه لما يبقي مكان عريق هتتاكدى إن بويضاتك في أمان لوقت طويل جدا، و المعمل فيه تقنيات حديثة وجديدة بتعرفنا الادوات المستخدمة بتاعة انهى مريضة ورقم ملفها ولايمكن تتلخبط .

ومن المراكز المعروفة ولها تاريخ كبير وسمعة وخبرة في المجال دة “المركز المصري لأطفال الأنابيب” 

https://www.facebook.com/egyptianivfcenter/

ولو حد محتاج يعرف او يفهم اكتر عن اجراء تجميد البويضات…دة فيديو مع د.منى أبو الغار / أستاذ أمراض النسا والتوليد بجامعة القاهرة واستشاري العقم وأطفال الأنابيب

https://fb.watch/9UdPGDk8S1/

 

أخيرا أحب أقول إن في رأيي الخاص إن تجميد البويضات دة افتكاسة علمية هتسهل حياتنا كستات و أمهات ، أو هي فعلا سهلتها، و هتسهل علينا قرار أختيار الوقت المناسب للأمومة ، لأن الأمومة علي أد ما هي تجربة ممتعة و استثنائية بس كمان ماتنسوش إنها مسئولية كبيرة جدا ، ماينفعش نستعجل فيها .أنا من الناس اللي مكنتش بفكر أخلف تاني ، بس بعد ما عرفت إن عندي الأوبشن دة إني أجمد بويضاتي و يمكن أقرر أغير رأيي كمان فترة ، فمحبش أبقي أتاخرت و ماقدرش ، و بفكر جديا أجمد بويضاتي !