أحلي أماكن لازم تزوريها وقت الشتا في مصر

الشتا بيخلص خلاص، والسفر في موسم الشتا ليه متعة تانية خالص، وفي مصر على وجه الخصوص فيه أماكن كتيرة ماينفعش تتراح غير وقت الشتا.

 لو إنتي من محبي التراث والتاريخ والتعرف على حضارات مختلفة، تأكدي إن الأمكان اللي هنقولك عليها هتخليكي تقضي أجازة شتويه مختلفه من نوعها.

١- واحة سيوة

من أكتر الأماكن اللي الناس بتروحها كتير الفتره ديه هي واحة سيوة، لأنها فعلا ممكان مميز وغني جدا بالمواقع اللي كل ركن فيها بيحكي تاريخ سيوة،

 فلو نفسك تفصلي من الزحمة إللي في حياتك هتلاقي :

• جزيرة طغاغين وهي منتجع ساحر في قلب بحيرة سيوة هي الإختيار المثالي،
• طبعا طبعا البحيرات المالحة، واللي من أشهر الأماكن في سيوه وفيها أكتر من 60 مليون طن من الملح واللي له استخدامات كتير علاجية وصناعية، و أهم حاجة بقي إنها بتشيل الطاقة السلبية  ودي طبعا حاجة كلنا محتاجينها،
• اما لو كنتي من هواة الأساطير، فعين كليوباترا هتبهرك بسحرها وجمالها و المياه الكبريتية اللي فيها و اللي بيجيلها الأجانب من آخر الدنيا عشان ينزلوا يستحموا فيها ،
• لو بقي ليكي في روح المغامرة، فأحلي سفاري ممكن تعمليه بالعربيات الجيب يتعمل في سيوة ، تجربة تانية خالص ، و ادرينالين تاني خالص، و بعدها تعملي الساند بوردنج في الصحرا و تتفرجي علي الغروب ، و لو عملتي كامب في الصحرا هتشوفي السما منورة بالنجوم و تنسي خالص كل الضغوط اللي عندك،
• أما لو إنتي بتحبي التاريخ وحكاياته، متحف البيت السيوي، قلعة شالي القديمة، ومعبد أمون هيحكولك قصص عن تراث وتاريخ أهل مصر في سيوة.
• وطبعا يعني مش هننسي الشوبينج لكل منتجات سيوة اليدوية و اللي هتلاقيه في منطقة السوق جنب قلعة شالي القديمة ، هناك هتقدري تشتري أحلي تمر و زيت زيتون و زيتون و عسل ، دة غير بقي الاباجورات من الصخر الملحي و اللي كمان بتشيل الطاقة السلبية في المكان و منتجات الخوص و الكليم باشكال والوان ماحصلتش.

٢- الفيوم

الفيوم ليها سحر خاص ومكانه في قلوبنا، أولا لأن أهل الفيوم ليهم طبع ترحابي يخليكي مش عايزه تمشي من المكان، وحقيقي الفيوم من أكتر الأماكن اللي ناس كتير بتحب تزوها في أي موسم لأن ليها مذاق تاني خالص، و كمان قريبة جدا ، يعني ساعة من طريق الفيوم اللي عند الرماية و تبقي هناك.

 من أشهر الأماكن في الفيوم واللي أكيد هتغير مودك وتنسيكي دنيتك كلها هي:

• قرية تونس، واللي فيها مساحات خضرا منعشه وبحيرة قارون قدامها الناحي التانية،
• ·       ده غير صناعة الخزف اللي ممكن تعملها في ورش كتير جوة قرية تونس، يعني عالم تاني خالص هتعيشيه في القرية ديه.
• المكان  المهم جدا في الفيوم  كمان، هو وادي الريان،

– و اللي فيه جبل المدورة و اللي ممكن تاخد من فوقه صور ماحصلتش ،

– دة غير طبعا البحيرة السحرية و اللي لون الميه فيها بيتغير علي مدار اليوم بالوان ساحرة و عشان كدة اتسمت البحيرة السحرية،

– في الصحرا البيضا بقي لوادي الريان تقدري تعملي ساند بوردنج و تشربوا احلي كوباية شاي بدوي علي الكليم في الصحرا، و تستمتعوا بالغروب ،

– واكيد مادام روحتي الفيوم يبقي لازم تتصوري جنب الشلالات و اللي بيجي لها السياح من كل مكان عشان يتصورورا جنبها،

• في كمان مدينة كرانيس الأثرية وقصر قارون ومحمية وادي الحيتان، و اللي فيها هتشوفوا حفريات الحيتان اللي كانت بتعيش في المنطقة دي لما كانت لسه بحر،
• ده غير في المسجد المعلق وإللي كلها أماكن هترجع بيكي 40 مليون سنه لورا هتشوفي فيها قصص وحكايات وهتعرفي أسرار كتير أوي عن تاريخ الفيوم الغني.

الكامب في صحرا الفيوم ممتع جدا لهواة الهدوء و النجوم و الصحرا.

٣- الأقصر

مدينة الأقصر ديه الملاذ الشتوي الشامل، من أول ما تدخلي المدينة وهتلاقي فيها الترفيه والتاريخ والحضاره في كل ركن هتمشي فيه،

لازم لما تروحي الأقصر ، تزوري كل اللي في البر الشرقي و اللي في البر الغربي ،

 البر الشرقي فيه :

• معبد الكرنك،
• · ومعبد الأقصر،
• · والسوق،
• متحف التحنيط،
• متحف الأقصر 

البر الغربي فيه:

• مدينة هابو،
• · و وادي الملوك ،
• ووادي الملكات،
• ·  و معبد حتشبسوت

من الذ الحاجات انك تتحركي جوة الأقصر بالحنطور ومراكب النيل ، و دي في حد ذاتها متعة لوحدها،

 مدينة الأقصر فيها ثلث أثار العالم، فتأكدي إن زيارتك هتكون مميزه،

– ولو نفسك في تجربة ترفيهية جديده، رحلات البالون الطائر هتاخدك في رحلة مدتها 45 دقيقة في سماء الأقصر هتشوفي فيها ثروات المدينة كلها، 

-ومن أكتر الأنشطة اللي بتشتهر بها المدينة هي الرحلات النيلية إللى بيكون فيها برامج ترفيهيه متنوعة وأكلات لذيذة جدّا، 

• والجديد كمان في الأقصر هي جزيرة الموز، و اللي بتروحيلها بمركب في النيل من البر الشرقي ، و فيها هتاكلي موز لسه مقطوف، و هتتفرجي علي الطبيعة و الزراعة و التماسيح و غيرها من الحيوانات و كمان ممكن تتغدي هناك.

٤- أسوان

مينفعش نتكلم عن  الأقصر من غير ما يكون وراها أسوان و النوبة علطول،

 أسوان دي حدوتة لوحدها، حالة من الراحة و الهدوء و الجمال في كل حتة فيها، كفاية ان كل تحركاتك فيها في النيل بمراكب،

أهل النوبة و اسوان مافيش في طيبتهم و لا في ذوقهم، تحبهم أول ما تشوفهم،

 من أشهر الأماكن التاريخية هناك هي :

• السد العالي،
• · المسلة الناقصة،
• ·  ومتحف النوبة،
• البيت النوبي،
• ·  جزيرة الفنتين،
• ·   جزيرة النباتات، 
• ضريح الأغا،
• ·  معبد فيله،
• معبد كوم امبو 
• معبد ادفو،
• ·  جزيرة أجيليكا،
• ·  مسجد الطابية، 
• ·   ومتحف أسوان.

– وفي كمان الجانب الجديد من أسوان وهو السوق، واللي هتلاقي فيها كل حاجه متاحة من البرفانات للبهارات وأدوات المنزل والصناعات اليدوية، أحلي زيوت و بخور و بهارات تجيبها من اسوان، دة غير طبعا الكركدية و الدوم،

 -بس أجمل حاجه هناك إنك هيبقى عندك فرصة تتعرفي على الثقافة النوبية الجميلة، وأهل النوبة وممكن تروحي كمان مركز أسوان الثقافي وتحضري حفلات الرقص النوبي اللي بتتعمل هناك كل ليلة.

طبعا دي مش كل الأماكن اللي ممكن تزوريها، دة بس جزء منها، في كمان :

• دهب، 
• و الصحرا البيضا و الصحرا السودا، 
• و سينا 
• و نوبيع 
• و طابا 
• و سانت كاترين،

واللي هنتكلم عنهم اكتر في مقالات جاية،

 الحقي سافري قبل الشتا مايخلص، و استمتعي بجمال مصر، و مش لازم نطلع اوربا ، فمصر أماكن احلي و اغني كتير من اوربا ومن أي مكان في الدنيا.