ازاي تستمعي بحياتك بعد الخمسين ؟

 ستات كتير تلاقيها بتقولك، أنا كبرت اوووي ، أنا بقي عندي ٥٠ سنة!

  طب وإيه يعنى ؟  العمر مجرد رقم ، المهم انتي احساسك إيه ؟ وعايزة تعيشي إزاى ؟

 فيه ستات كتير بتعتبر سن الخمسين ده يعنى أقعد في هدوء، وأبطل اخرج واراعى سنى،  وأتصرف على أساس إنى بقيت ست كبيرة، ده غير نظرة المجتمع كمان اللي بتحطلها لسته توقعات بالمفروض تعمل ايه و تبقي عاملة ازاي؟

بس الحقيقة إن ده مش مظبوط، ليه أصلا يبقي في توقعات عن المفروض تعملي ايه في سن معين ؟ نصيحة هقولهالك و بقولها لنفسي :  إوعى تعتبرى إن السن ده يعنى إنتى كبرتى و خلاص كدة يالا حسن الختام، واوعى تسمحى للمجتمع إنه يرسم لك حياتك ويحطك في برواز يقفل عليكى فيه ويخليكى تتصرفى حسب رؤيتهم هما، 

 سن الخمسين ده مرحلة جديدة وبداية جديدة، زى أى سن مريتى بيه،

 إزاى ؟

 تعالى أقولك:

 لما توصلى للسن ده بتلاقى مسؤولياتك قلت بشكل كبير، و أولادك الصغيرين اذا كان عندك ولاد، كبروا ومش محتاجينك زى الأول، وكل واحد منهم هاتلاقيه مشغول بحياته واصحابه، وبيبقى له عالم لوحده،  كتير في الوقت ده ستات بتبدأ تحس إنها وحيدة  وزهقانة، وإذا كان معندكيش ولاد، فسن الخمسين ده بيبقي رتمه اهدي من السنين اللي قبل كده، وده أنسب وقت  تعملى لنفسك عالم خاص بيكى أنتي!

في مجموعة من الاقتراحات واللي ستات كتير عملوها فعلا في سن الخمسين و كانت لهم بدايات جديدة لحاجات لذيذة و مسلية و مفيدة:

١-لو مشتركة في نادي ، أبداي روحي النادي أكتر ، أشتركي في رياضة جديدة، هتتعرفي علي ناس جداد و هيزود نشاطك و موودك علطول هيبقي حلو، لو مافيش نادي ، الجيم ماقصرش معانا في حاجة، و هتعرفي ناس كتير من سنك أو أصغر و هتعملي صداقات لذيذة ، غير إنك بتحافظي علي صحتك

٢-سافري علي اد ما تقدري، في السفر اكتر كتير من سبع فوايد، و مصر مليانة أماكن جميلة جدا و السفر ليها مش مكلف ، تقدري تسافري مع جروبات، منها تتعرفي علي ناس جديدة و منها تشوفي أماكن حلوة و تستمعي بوقتك 

٣-خدي كورسات تعلمك حاجات جديدة، في أماكن كتير جدا بيدوا كورسات في حاجات مختلفة، سواء بقي لغة جديدة، حاجة يدوية جديدة، حفظ قرآن، رسم ، موسيقي ، أو أي حاجة تحبيها

٤- عيدي اكتشاف نفسك، ايه اللي بتحبي تعمليه و ماكانش عندك وقت تعمليه، و ابدأي فيه

٥-لو صعب نزولك كتير ، ففيديوهات الانترنت ماسبتش حاجة، من رياضة ، لتعليم مهارات و لغات و ويوجا و رقص و كله ، تقدري تعملي حاجات كتير كمان بوقتك اللي  في البيت

٦-القراءة ، الحقيقة إن القراية من أحلي و الذ الحاجات، ومع ذلك في ناس كتير بتستتقل القراية، بس برده ليها حل ، في كتب صوتيه ، يعني سهل أوي تسمعي راوية كاملة، و تتخيلي احداثها و تعيشي معاها، ديما القراية بتنقلك لعالم مختلف و تعيشك تجارب يمكن صعب تعيشيها في حياتك. 

  طيب لو مش بتاعة هوايات، وملكيش طاقة تتعلمى حاجة جديدة، برده ليها حل،  الأحلام المؤجلة!! 

 تبدأى تحققى امنياتك واحلامك اللى أخرتيها شوية، وقتها هاتحسى بسعادة كبيرة جدا،  لأنك حققتى اللى كنتى بتحلمى بيه وسعادتك دى هاتخليكى ولا بنت العشرين ، السن اللى جوانا أهم كتير قوى من السن اللى في البطاقة.

عيشي و استمتعي بكل مرحلة في حياتك ، استمتعي بكل سن بتعدي بيه!