قانون الجاذبية .. حقيقية ولا أي كلام؟

زمان ماكنتش فاهمة يعني ايه لما اكون عايزة حاجة من قلبي بجد الكون كله بيتّحد انه يحققلي اللي انا عايزاه،

كنت فاكرة ان ده معناه اني هاوصل للي انا عايزاه :

-بالدعوات الكتير،

– او بال obsession،

– او حتى بالزن،

 حاجات كتير اوي اتعاملت معاها بالمنظور ده، زي شغل حاربت اني اتقبل فيه، أو شخص عملت المستحيل عشان ابقى معاه.،

كنت فاكرة ان الموضوع مرتبط بالسعي  ، الحقيقة انه طلع مش بس بالسعي، انا فعلاً وصلت للي كنت عايزاه، بس ولا اتبسط بيه ولا عرفت اكمل فيه ،

والسبب اني جذبت الحاجات الغلط! 

قانون الجذب ماطلعش بالعافية و المعافرة ، هو طلع انتي بتجذبي ايه ليكي وانتي مش حاسة ومن غير اي مجهود منك،

بتجذبي ايه حسب انتي شايفة نفسك ازاي وشايفة قدراتك و احلامك ازاي؟ و حسب افكارك و نظرتك للحياة في العموم!

 انا كنت شايفة نفسي بمنظور دوني او قليل -زي ما ناس كتير قريبة مني كانت محسساني بكدة- فجذبت حاجات كتير كانت قليلة و مش مناسبة ليا و دافنة قدراتي،

ازاي؟ 

هقولكم …

– اشتغلت شغل روتيني عشان كنت فاكرة اني مش هاعرف اعمل غير كدة،

– اتجوزت راجل بكل المقاييس مش مناسب ليا لمجرد اني كنت حاسة اني ماستهلش احسن من كدة،

– فضلت سنين مش بجذب غير الفشل و الروتين وانا مش فاهمة ليه و فقدت الايمان بقانون الجذب، كنت فاكرة انه طلع خرافة لاني ماكنتش عارفة اوصل للي بسعى ليه و بحلم بيه. 

حصلتلي صدمات كتير ..اتهزيت .. معتقداتي الدينية و التربوية خبطت في حيطة .. اتغيرت .. فقررت اقف مع نفسي و افهم اكتر عن طبيعة النفس البشرية عشان أحلل المشكلة جاية منين. 

طبعاً القدر مافيهوش نقاش، و الابتلاءات و الأزمات مش كلها طبعاً ليها مبرر مفهوم أو ليها سبب احنا وراه، بس في حاجات كتير بتحصلنا عشان معتقداتنا و حالتنا النفسية و الذهنية هي اللي بتجذبها لينا، حاجات كتير بتحصلنا طلعنا احنا المسؤلين عنها.

لما قريت شوية كتب و مقالات و اتفرجت على شوية فيديوهات، و كمان روحت لدكاترة نفسانيين، و بعدها راجعت شريط حياتي كله،

اكتشفت ان حاجات كتير غلط من اللي حصلتلي انا اللي جذبتها بطريقة تفكيري:

 -لما كنت بحس اني ماستاهلش كانت الناس بتعاملني على اني مستاهلش ،

 -لما كنت بخاف اتكلم أو أعترض أو أعمل حاجات جديدة كنت بفضل في مكاني ،

– لما كنت بخاف من الحسد كنت بتحسد ،

-ولما كنت بشوف الدنيا وحشة كانت كل حاجة وحشة بتحصلي فعلاً، 

بعد لحظة الادراك دي، قررت اني هاخد بالي اوي من my mindset عشان اجذب كل حاجة نفسي فيها و أستاهلها بجد.. و ده اللي حصل فعلاً، 

لما حسيت بقيمة نفسي، الكون بقى بيفلتر الناس اللي حواليا؛

 الناس الغلط اللي ماكنتش استاهلها ولا تستاهلني بعدوا عني على أهون الأسباب،

 انفصلت .. و دي كانت أول مرة أخد موقف حازم ومارجعش فيه، و ربنا رتب الموضوع بشكل غريب و سلس كأنه بيقولي انتي دلوقتي جاهزة، انتي فوقتي و جذبتي اللي تستاهليه،

لما بدأت أفكر في التغيير واني عايزة أعمل حاجات جديدة و مفيدة في حياتي، بدأت تتفتحلي مجالات و فرص أنشطة و كورسات و شغل منغير حتى ماسعالها،

لما مابقتش بفكر ولا بحسب وببعد عن النكد و السلبية، بقيت بشوف الحلو اللي في الدنيا وفي الناس، و مكملة حياتي عادي رغم كل الصعوبات اللي مريت بيها و كانت كفيلة انها توقف حياتي وتهدني.

عشان كدة من تجربتي المتواضعة احب اقولكوا، خلوا عقلكوا و قلبكوا دايماً ايجابيين و قدّروا نفسكوا كويس .. عشان تجذبوا دايماً اللي تستاهلوه 😊