in , , ,

ليه مابقتش اقدر أمسك نفسي عند التبول؟

ستات كتير بتسأل ، ليه مابقتش أقدر أمسك نفسي عند التبول ؟ الحقيقة عشان نرد علي السؤال دة لازم نعرف، يعني إيه سلس بولي؟ يعني ايه تسريب بولي؟ وهل في فرق بين الحاجتين و لا لأ؟

الأكيد إن  الأتنين حاجة واحدة،  لكن مسميات مختلفة ، وتعريف الحالة دي هي نزول البول لا اراديا، أو غصب عن الشخص، أو بدون القدرة على التحكم فيه، 

في شوية معتقدات غلط ودارجة متعارف عليها في الموضوع دة، المعتتقدات دي بتقول إن:

١-السلس البولي حاجة لازم هتحصل لكل بنت أو ست، وبتحصل مع تقادم السن، وأنقطاع الدورة الشهرية، وإن مالوش علاج، ولازم ولابد إن الستات تتعايش معاه، لان ببساطة كل الستات عندها المشكلة دي. 

٢-السلس البولي نوع واحد بس، وعلاجه -إن وجد- ممكن جدا نعرفه بطرق بسيطة، يعني مثلا من الأصحاب، أو من دكتور صديق، أو صيدلي مقرب.

            طيب خلينا نسأل كام سؤال!!

هل انتي بتعاني من نزول البول لاإراديا مع الضحك، أو الكحة والعطس، أو لما تشيلي حاجات تقيلة؟

 إذا كانت الاعراض دي عندك، يبقي إنتي عندك سلس بولي أجهادي!

واللي هو نزول البول من غير ما تقدري تتحكمي فيه مع أي زيادة في ضغط البطن، والنوع ده من السلس البولي هو الأكثر شيوعا و أنتشارا عند الستات،

أسبابه بقي كتيرة، منها الولادات المتكررة، وزيادة الوزن، وأنقطاع الدورة الشهرية .

حاجة كمان مهم أوي تعرفيها، إن السلس البولي الإجهادي دة درجات كتيرة،  بتبدأ بنقط بسيطة مع العطس أو الكحة الجامدة، لحد نزول كميات كبيرة مع الضحك أو مع رفع حاجات تقيلة،

 طيب علاجه إيه؟

العلاج مش لازم  يكون دائما  جراحي، ممكن يبدأ بعمل تمرينات لتقوية عضلات الحوض وصمام مجري البول في الدرجات البسيطة للمرض،

اما بقي لو التمرينات دي مجابتش نتيجة، او إذا كانت درجة السلس البولي الإجهادي متقدمة، ساعتها ممكن نلجآ للحل الجراحي عن طريق تركيب شريط مهبلي لعلاج السلس البولي الإجهادي ، ودي عملية بسيطة، وبتستغرق حوالي من ٣٠ الي ٤٥ دقيقة.

كمان في نوع تاني  منتشر جدا حابب اكلمكم عنه،  بس الأول أسال كام سؤال،

 هل بيجيلك مرة واحدة وبطريقة مفاجئة رغبة ملحة للتبول أول ما تقربي من البيت أو تركبي الأسانسير طالعة بيتك أو تفتحي المياه عشان تغسلي ايديكي؟

 هل ده بيحصل معاه ساعات نزول نقط بول أو حتى نزول كميات كبيرة قبل وصولك للحمام؟

 إذا كانت الإجابة اه،

يبقي إنتي عندك سلس بولي منذر أو مثانة عصبية أو فرط نشاط المثانة! 

يعني إيه؟ 

يعني السلس البولي المنذردة بيحصل في أي سن و لأي حد، لكنه منتشر أكتر عند الستات، وبيزيد وجوده مع تقدم السن، وأنقطاع الدورة لقلة هرمون الانوثة (الاستوجين)، ولكن ممكن كمان نشوفه في الأطفال، وده ممكن يكون بسبب اختلافات خلقية، أو ممكن يكون بدون أسباب معروفة،

 أعراض المثانة العصبية متنوعة شوية:

 ممكن تبدأ بدخول الحمام كل شوية مع تبول كميات بسيطة، لإن الدخول بيكون متكرر فمفيش فرصة لتكوين كميات كبيرة من البول، 

الصحيان المتكرر من النوم بالليل لدخول الحمام،

 الإحساس الملح والمفاجئ للتبول مع احتمالية إنه يحصل سلس بولي، وممكن الموضوع يبقي سيئ أكتر خاصة إذا حصل السلس البولي دة بكميات كبيرة،  واللي بتكون محرجة جدا للمريضة طبعا.

طرق العلاج كتيرة:

– بداية من تمرينات للتحكم بالمثانة البولية (يعني إزاي نخليها ترجع تاني تحت ارادتنا)،

– تنظيم شرب السوائل والامتناع أو التقليل من بعض المشروبات والمأكولات زي الشاي، القهوة، النسكافيه، الحمضيات زي الليمون والبرتقال، وكمان الحوادق،

– العلاج بالعقاقير الطبية واللي بيعتبر الأساس في  الحالات دي،  والأدوية دي بتقلل من انقباضات المثانة اللإرادية اللي بتسبب الأعراض اللي قولناها،

في حالة بقي إن  العلاجات دي منفعتش، ممكن نحقن المثانة البولية بالبوتكس باستخدام المنظار ودي حاجة بسيطة والمريضة بتروح بعد ساعتين لبيتها عادي.

 و في النهاية مهم أوي نقولك متتهاونيش في حالتك لو عندك إي عرض من الأعراض اللي فوق، وأطلبي علطول المشورة الطبية، عشان الاعراض متزيدش وساعتها كمان حتزيد درجة السلس البولي، وخليكي مطمنة إن في دايما حل لمشكلتك.

 

Wally Mahfouz

Associate Professor of Urology,

Female Urology, Functional Urology & Voiding Dysfunction Unit, Alexandria University, EgyptFellow of McGill University, Montreal, Canada

Fellow of Perugia University, Santa Maria Della Misericordia Hospital, Perugia, Italy 

Fellow of University Hospital of KU Leuven, UZ Leuven, Belgium

What do you think?

Written by Editor

Comments

Leave a Reply

Your email address will not be published. Required fields are marked *

Loading…

0

Comments

0 comments

How to spice up your sexual life after a long marriage?

مش إنتي بتعرفي تـمالتي تاسك برضه؟